पुरुषोत्तम यादव ,
जनकपुरधाम । विश्व मानव बेचविखनविरुद्ध दिवस धनुषाको जनकपुरधाम पनि मनाइएको छ । ३० जुलाई २०२५ को अवसरमा मानव बेचविखनविरुद्ध अभिमुखीकरण कार्यक्रम गरी दिवस मनाइएको हो ।
जनकपुरधाम उपमहानगरपालिका स्थित सिद्धार्थ र मोनास्टिक माध्यमिक विद्यालयका विद्यार्थीहरुलाई अभिमुखीकरण गरिएको हो । अभिमुखीकरण कार्यक्रममा अधिवक्ता राजकुमार महासेठ, इनसेकका राजु पासवान, माइती नेपालका नितु राय, महिला मानव रक्षक संजालका जमुना भुजेल,ग्रिण स्पेश नेपालका उपाध्यक्ष अमित मिश्र, युवा अभियान्ता कायापल्टका संस्थापक अध्यक्ष दिवाकर उप्रेती,शान्ति पुन:स्थापना गृहका रिना झा,आफन्त नेपालका कविता यादव तथा जिल्ला प्रहरी कार्यालय धनुषाका प्रहरी निरिक्षक जीवन सिंह लगायतका प्रतिनिधि ज्यूहरु द्वरा सहभागी विद्यार्थीहरुलाई प्रस्तुतीकरण गर्नुभएको थियो ।
उक्त अभिमुखिकरणमा अशिक्षित, गरीब, घरेलु हिंसामा परेका एकल महिला, बेसहारा, रोजगारीको खोजीमा भौतारिरहेका महिला तथा युवती बेचविखनको जोखिममा पर्ने गरेको बताउनुभयो ।
यौन व्यवसाय, घरेलु कामदार र श्रम शोषण, कृषि, कलकारखाना, उत्तेजक नाच, होटल रेष्टुरेष्ट, मसाज, पार्लर, सर्कस, माग्ने बनाउन, मानव अंग खरिदविक्रीका लागि बेचबिखन ओसारपसार जस्ता काममा लगाइनेगरेको बताउनुभयो । खास गरी प्रमुख गन्तव्यका रुपमा भारतको मुम्बई, दिल्ली, कोलकाता, पुना, शिलगुढी जस्ता ठाउँहरु बेचबिखनका मुख्य गन्तव्य हुने गरेकोमा नयाँ गन्तव्यका रुपमा खाडी देशहरु कुबेत, साउदी अरब, बंगलादेश, चीन, दुबई, इराक पर्ने गरेका छन ।
मानव बेचविखन तथा ओसारपसरमा संलग्न व्यक्तिलाई नेपालको कानूनमा १ महिना देखि २० वर्षसम्म कैद सजाय हुने व्यवस्था छ । त्यस्तै गरी ५० हजारदेखि ५ लाखसम्म जरिवानाको पनि व्यवस्था रहेको कानुनी प्रवधानहरुका बारेमा अभिमुखिकरण गरिएको थियो ।
नियन्त्रणका लागि थुप्रैचुनौती रहेको पनि बताउनुभयो। यस क्षेत्रमा काम गरिरहनु भएका अभियानीहरुले सूचना प्राप्त गर्न ग्राहो हुनु, साक्षी गवाह, र सबुत प्रमाणहरु संकलन गर्न ज्यादै कठिन हुनु, स्थानीयस्तरमा प्रतिकार र दबाब समूहको सक्रियताको अभाव जस्ता चुनौती रहेको स्ष्पष्ट पार्नुभयो । समन्वयको अभाव, दक्ष जनशक्तिको अभाव, लैंगिक विभेद, घरेलु हिंसा, धार्मिक तथा सामाजिक कुरीतिहरु चुनौती रहेको वक्ताहरुले बताउनुभयो ।
प्रकाशित मिति: २०२५-०७-२९ , समय : १८:२७:५९ , १ महिना अगाडि