पुरुषोत्तम यादव ,
जनकपुरधाम । धनुषा जिल्लाको मिथिला बिहारी नगरपालिका–७ मा सहिद चन्देश्वर मण्डलको २०औं स्मृति दिवस कार्यक्रम सम्पन्न भएको छ ।
कार्यक्रममा सहिद मण्डलको बलिदानलाई स्मरण गर्दै सहभागी नेताहरुले जनताको अधिकार र समानताको आन्दोलनलाई सफल पार्न सहिदका सपनालाई पूरा गर्ने संकल्प व्यक्त गरेका थिए ।
प्रमुख अतिथि पार्टी उपाध्यक्ष पम्फा भुसालले भूमि, निजामति र शिक्षा सम्बन्धी कानुनमाथि सरकारले अपनाएको नीति संघीयता र समावेशी लोकतन्त्र कमजोर बनाउने खतरा रहेको बताइन् । संघीय कार्यान्वयनका लागि आवश्यक कानुन निर्माणमा सरकार उदासीन रहेको आरोप लगाउँदै उनले नेकपा एकीकृत समाजवादी, नेकपा विप्लव समूह र जनता समाजवादी पार्टीबीच एकीकरणबारे सकारात्मक वार्ता भइरहेको जानकारी दिइन् ।
कार्यक्रमलाई सम्बोधन गर्दै विशिष्ट अतिथि केन्द्रीय उप महासचिव तथा मधेस प्रदेश इन्चार्ज मातृकाप्रसाद यादवले सहिदहरूको बलिदानबाट प्रेरणा लिनुपर्नेमा जोड दिँदै पार्टीभित्र देखिएको गुटबन्दी र कमजोरीप्रति चिन्ता व्यक्त गरे । त्यस्तै केन्द्रीय सदस्य तथा धनुषा जिल्ला इन्चार्ज श्रावण बरवरिया यादव, पुर्व जिल्ला अध्यक्ष एवं प्रदेश सदस्य झल्कु भिन्वार यादव, जिल्ला संयोजक दिपक यादव, सुनिल यादव, रोशन यादव, देवसागर दास, वाइसीएल नेता सरोज यादव ,सहिदनगर नगरपालिकाका पुर्व नगर प्रमुख एवं प्रदेश सदस्य उदय बरबरिया यादव धनुषाधामका नगर अध्यक्ष विश्नी यादव र जनसांस्कृतिक महासंघ मधेस प्रदेश संयोजक राजेश सक्सेनालगायत नेताहरुले सहिद मण्डलको योगदानलाई स्मरण गरेका थिए ।
कार्यक्रमको अध्यक्षता नगर कमिटी अध्यक्ष प्रदीप साहले गरेका थिए भने सञ्चालन सचिव तथा वडा नं.७ का अध्यक्ष संजय शर्माले गरेका थिए । स्वागत मन्तव्य मेयर प्रत्यासी सूर्यनारायणले गरेका थिए ।
स्मृति दिवसकै अवसरमा मिथिला बिहारी नगरपालिका भित्रका जनयुद्धका सहिद परिवारलाई सम्मान गरिएको थियो । साथै आयोजित रक्तदान कार्यक्रममा ४५ जना सहभागी भई रक्तदान गरेका थिए ।
प्रकाशित मिति: २०२५-०८-१७ , समय : २३:२२:१९ , २ हप्ता अगाडि