पुरुषोत्तम यादव ,
चितवन — आदिवासी जनजाति समुदायको इतिहास, भाषा, संस्कार, संस्कृति, रीतिरिवाज तथा परम्पराको संरक्षण, प्रवर्द्धन र अभिलेखीकरणमा उल्लेखनीय योगदान पुर्याउँदै आएका पत्रकार पूर्ण बहादुर मगरलाई ‘फोनिज बागमती पत्रकारिता पुरस्कार–२०८२’ प्रदान गरिएको छ।
फोनिजको २६औँ स्थापना दिवसको अवसरमा आयोजित फोनिज राष्ट्रिय अवार्ड समारोहमा नेपाल सरकारका प्रवक्ता तथा सञ्चार तथा सूचना प्रविधि मन्त्री पृथ्वी सुब्बा गुरुङको हातबाट मगरलाई सम्मानपत्र प्रदान गरिएको हो।
एक दशकभन्दा लामो समयदेखि रेडियो पत्रकारितामा सक्रिय रहेका मगर हाल राप्ती नगरपालिकाका नगर प्रमुख शमशेर लामाको प्रेस संयोजक तथा सचिवालय प्रमुखका रूपमा पनि कार्यरत छन्। उनी हाम्रो राप्ती एफ एम ८८.५ मेगाहर्ज र बिशाल न्युज दैनिक मा समेत आबद्ध छन्।
मगरले विशेषगरी आदिवासी जनजातिको पहिचान र अधिकार सुनिश्चित गर्न, तिनको संस्कृति, परम्परा र भाषाको संरक्षण तथा प्रवर्द्धनमा केन्द्रित भएर पत्रकारिता गर्दै आएका छन्। पुरस्कारबाट सम्मानित गर्दै फोनिज परिवारले मगरको दृढ संकल्प, निष्ठा र श्रमको उच्च मूल्याङ्कन गर्दै आगामी दिनमा अझ प्रेरणादायी उपलब्धिहरू हासिल होस् भन्ने शुभकामना व्यक्त गरेको छ।
प्रकाशित मिति: २०२५-०८-१३ , समय : ०९:५९:४९ , २ हप्ता अगाडि