पुरुषाेतम यादव ,
जनकपुरधाम, २५ साउन । मधेश प्रदेश सरकारको शिक्षा तथा संस्कृति मन्त्रालय, जनकपुरधामले माध्यमिक तह कक्षा ९–१० का लागि ८२ जना स्वयंसेवक शिक्षकको दरखास्त आह्वान गरेको छ। मन्त्रालयले २०८२।०४।२५ मा सार्वजनिक गरेको सूचनाअनुसार नेपाली, अंग्रेजी, गणित र विज्ञान विषयका लागि स्वयमसेवक शिक्षक माग गरिएको हो।
सूचना अनुसार, नेपाली विषयमा २०, अंग्रेजीमा २०, गणितमा २२ र विज्ञानमा २० जना स्वयंसेवक शिक्षक आवश्यक छन् । दरखास्त दिने आवेदकको उमेर २१ वर्ष पूरा भई ५८ वर्ष ननाघेको हुनुपर्ने, नैतिक पतन देखिने अपराधमा सजाय नपाएको, सरकारी शिक्षक सेवामा नियुक्त नभएको, सम्बन्धित विषयमा स्नातक तह उत्तीर्ण भएको र शिक्षक सेवा आयोगबाट प्राप्त स्थायी अध्यापन अनुमति पत्र भएको हुनुपर्ने मन्त्रालयले जनाएको छ।
स्वयंसेवक शिक्षकको छनोट लिखित परीक्षा र अन्तर्वार्तामार्फत गरिने छ। दरखास्त बुझाउने अन्तिम मिति २०८२।०५।०८ तोकिएको छ। इच्छुक नेपाली नागरिकले आवश्यक कागजातसहित मन्त्रालयमा दरखास्त बुझाउन सक्नेछन्।
प्रकाशित मिति: २०२५-०८-१० , समय : १५:२५:०९ , ३ हप्ता अगाडि