पुरुषोत्तम यादव ,
जनकपुरधाम : पर्साको वीरगंजमा हैजाको संक्रमण देखिएपछि मधेश प्रदेश सरकारले उपचार र नियन्त्रणका लागि सक्रियता देखाएको छ।
प्रदेश सरकारका कार्यवाहक मुख्यमन्त्री सरोजकुमार यादवले संक्रमित क्षेत्रका स्थानीयलाई तत्काल आवश्यक उपचार उपलब्ध गराउन स्वास्थ्य तथा जनसंख्या मन्त्रालयलाई निर्देशन दिएका छन्। उनले संक्रमण थप नफैलियोस् भन्ने उद्देश्यले तत्कालीन कदम चाल्न आदेश दिएका हुन्।
स्वास्थ्य तथा जनसंख्या मन्त्री शत्रुधन प्रसाद सिंहले पनि प्रभावित क्षेत्रमा खटिएका स्वास्थ्यकर्मीलाई सतर्क रहन र उपचार सेवा प्रभावकारी बनाउन निर्देशन दिएका छन्।
संक्रमण नियन्त्रणका लागि मन्त्रालयका महाशाखा प्रमुख डा. विपिनकुमार झा र जनस्वास्थ्य अधिकृत सन्तोषकुमार ठाकुरलाई वीरगंज पठाइएको छ। उनीहरूले स्थानीय स्वास्थ्य कार्यालयसँग समन्वय गरेर हैजाको उपचार तथा नियन्त्रणलाई तीव्रता दिने जिम्मेवारी पाएका छन्।
यसअघि प्रदेश स्वास्थ्य निर्देशनालय र स्थानीय स्वास्थ्य कार्यालयलाई सक्रिय पारिएको छ।
प्रकाशित मिति: २०२५-०८-२३ , समय : १८:१०:०५ , ६ दिन अगाडि